Home News Ванковска: Пендаровски, не може така – во исто време велиш „За многу...

Ванковска: Пендаровски, не може така – во исто време велиш „За многу години Илинден!“ и „Да ни е вечна и вековита република Северна Македонија!“

Претседателот, Стево Пендаровски, во честитката за 2 Август, Илинден – Денот на Републиката, меѓу другото, рече:

„На 2 август 1903-та, борбата за слобода ја започна револуционерната илинденска генерација која во епохата на монархии прогласи демократска република, а во времето на тесногради национализми реши да гради соживот меѓу различните.

Борбата за слобода ја продолжи славната антифашистичка генерација која ги надмина пропагандите и поделбите и се сплоти околу идејата за слободен народ во своја, слободна држава.

Како што сведочи и Манифестот, на 2 август 1944-та, делегатите на АСНОМ го остварија сонот за слободна македонска држава во која сите нејзини граѓани се еднакви и рамноправни пред законите, независно од нивните разлики и уверувања“, вели претседателот.

Но, еднаш добиена, додава тој, слободата мора да се одржува преку посветена работа на секоја нова генерација.

„Годинава прославуваме 30 години од независноста, години во кои имавме и подеми и падови, три децении на успеси, но и на бројни надворешни и внатрешни искушенија кои предизвикаа длабоки кризи и поделби.

Во овие времиња на неизвесност за нас, но и за целиот свет, ќе мора одново да ги надминеме внатрешните поделби и да се обединиме околу изворните илинденски и АСНОМ-ски идеали.

Да ја вратиме довербата на граѓаните во државата преку јакнење на демократските институции и владеењето на правото.

Да им овозможиме на младите тука да го градат својот свет и да ги почитуваме различните од нас, како претпоставка за општество на рамноправни граѓани.

Слободата се раѓа како идеа, се стекнува со борба, а се одржува преку напорите на секоја генерација, на секој еден од нас“, вели Пендаровски.

На неговиот говор, со реакција се јави професорката Билјана Ванковска:

„Во видео обраќањето, Пендаровски дава дефиниција на оксиморон.

Не може во исто време да ни е „За многу години Илинден!“ и „Да ни е вечна и вековита република Северна Македонија!“. Тие две работи не одат заедно! Ниту илинденците, ниту партизаните се бореле за нивната Северна, а како и се’ под сонцето, и Северна нема да биде вечна ниту вековита.

Оваа политички и морално корумпирана врхушка не може да ги узурпира ниту идеалите на предците, ниту тие на идните генерации. Нивниот Устав е климав и никако не е вечен.

Северна ќе се стопи под жешкото сонце како топка мраз после летен порој со град.

Да живее Република Македонија, да живее македонскиот народ!“

Previous articleСе огласи Ѓорге Иванов и го објави својот последен говор на Мечкин Камен во Крушево
Next articleИлинден прогласен за ден на македонското наследство во Вашингтон