Home News На изненадување на многумина, синоќа Град Скопје со кој раководи Данела Арсовска,...

На изненадување на многумина, синоќа Град Скопје со кој раководи Данела Арсовска, објави дека од вчера е бесплатен јавниот превоз во Скопје

Од владејачкиот СДСМ вчера рекоа дека Данела Арсовска за Секторот за животна средина во буџетот на Градот за 2022 година предвидела три пати помалку средства во споредба со оваа 2021 година.

Иако градоначалничката Данела Арсовска ветуваше инвестиции во животната средина и бopба против аерозгадувањето, додаваат од СДСМ, таа го намалува буџетот за животна средина од 213 милиони денари, колку што изнесува оваа година, на 73 милиони денари во 2022 година.

Истовремено, потсетуваат од оваа партија, Арсовска го укина БРТ системот кој е еколошки проект за јавен превоз.

-Со ваков пристап нема борба против загадувањето, нема чист воздух. Благодарение на мерките спроведени од централната и локалната власт на СДСМ во изминатите четири години, аерозагадувањето во Скопје се намали за 33 отсто, посочуваат од партијата на власт.

Дополнуваат дека, Град Скопје и градоначалничката, треба да престанат да ја манипулираат јавноста и да се фатат за работа, за исполнување на она што Данела Арсовска им го ветила на граѓаните.

Вчера околу 17 часот, најпрво ЈСП Скопје, а потоа и Град Скопје, на чие чело е новоизбраната градоначалничка Данела Арсовска, објавија важна вест во насока на помало загадување во градот.

Имено, тие обзнанија дека од вчера од 18 часот, градскиот јавен превоз ќе биде бесплатен, до некое следно известување:

„Согласно Законот за квалитет на амбиентниот воздух и по добиеното известување од страна на Министерството за животна средина и просторно планирање дека квалитетот на воздухот последователно два дена е надминат над законски пропишаниот миниумум, (над 150 μg/m3 среднодневни концентрации на ПМ10) на мерните станици во Центар, Лисиче, Гази Баба и Ректорат, Градот Скопје ги информира граѓаните дека ги прогласува следните мерки од прв степен – предупредувања и препораки за намалување на загадувањето на воздухот и заштита на здравјето на граѓаните:

-Бесплатен јавен превоз во автобусите на ЈСП и на приватните превозници. Зајакнат инспекциски надзор на инсталациите под надлежност на Град Скопје

-Ограничување на градежни активности на објектите во надлежност на Град Скопје. Интезивна контрола на градилиштата, односно возилата што излегуваат од градилиштата мора да имаат измиени тркала и да се покриени со церади заради контрола на прашината.

-Зачестено машинско миење на градските улици и булевари што се во надлежност на Град Скопје и препорака на скопските општини да го направат истото на улиците што се во нивна надлежност.

-Зајакната контрола на имателите на одобренија за доставување на стока преку Инспекторатот на Град Скопје.

Воедно го повикуваме Министерството за внатрешни работи да спроведе засилени контроли на правните субјекти кои поседуваат одобренија за доставување на стоки издадени од страна на Градот Скопје.

– Апел до вработените во Град Скопје, јавните претпријатија и институции на работа да доаѓаат со автобусите на јавниот превоз.

– Градоначалниците на општините во градот Скопје да ги интензивираат инспекциските надзори над субјектите кои управуваат со отпадни гуми и отпадни масла.

– Министерството за внатрешни работи да спроведе ограничување на обуките на автошколите од 9,30 до 14,30 и по 18,00 часот.

– Министерството за животна средина, Државниот инспекторат за животна средина и општините да извршат засилени контроли над инсталациите што се под нивни ингеренции.

– Министерството за внатрешни работи да ги зајакне контролите на почитување на забраната за движење на тешки товарни возила чијашто крајна дестинација не е Градот Скопје и кои ќе се упатуваат да ја користат скопската обиколница, во согласност со поставената сообраќајна сигнализација.

– Министерството за внатрешни работи да врши зачестени контроли на издувните гасови на возилата кои учествуваат во сообраќајот.

– Откажување/одложување на јавни собири, спортски настани и културни настани на отворено. Препорака градежната механизација да не се става во употреба за време на сообраќајниот метеж. Да се користи јавниот превоз, возилата да се користат само во непоходни ситуации.

– За затоплување на домовите да не се користат отпадни материјали, прегорено машинсо масло, лакирани и обоени отпадоци од дрво, стиропор, ПЕТ амбалажа, гуми и каков било синтетички материјал.

– Да се користи суво и чисто дрво без примеси од земја и отпадоци. Печките на дрво да се користат и одржуваат според упатствата на производителот. Редовно да се чистат оџаците.

Итните мерки и препораки за намалување на загадувањето на воздухот се согласно Краткорочниот акционен план за заштита на амбиентниот воздух во град Скопје кој е донесен од Советот на Град Скопје. Овие мерки ќе бидат во сила се додека не се намали загадувањето под прагот за алармирање, односно под 100 микрограми на кубен метар.

Град Скопје ги повикува граѓаните да се придржуваат до дадените мерки и да го сведат своето движење на отворен простор само на неопходни излегувања, малите деца, бремените жени, хроничните болни, постарите луѓе да не излегуваат на улица и да не се проветруваат просториите во кои се престојува.

Градот Скопје веќе започна со сет системски и конкретни мерки за справување со загадениот воздух и токму ова е еден од најголемите приоритети на кој ќе работи новата градска администрација.

Овие комплементарни мерки за обезбедување повисок квалитет на живот за граѓаните, ќе придонесат за намалување на нивото на загаден воздух во Скопје, а за секоја настаната промена на состојбата јавноста ќе биде редовно известена.

Previous articleДоцна синоќа се огласи Димитар Ковачевски – кажа до кој датум очекува да ја состави новата Влада
Next articleЗаигра танго со непознат маж- Калиопи денес слави, еве колку години наполни, никој не би ѝ ги дал, изгледа како девојче (ВИДЕО)